ગાંડા હનુમંત, ગાંડા વિભીષણ,
ગાંડી શબરી નાર.. જી
ગાંડા ગુહ્ય હે પગ ધોઈ ને,
પ્રભુ ઉતાર્યા પાર
જો જો તમે આ ગાંડાની વણઝાર

ગોકુળ ગામની ગોપીઓ ગાંડી,
ભૂલી ઘર વ્યવહાર.. જી
બંસી નાદે ચાલી નીકળી,
સુતા મેલી ભરથાર
જો જો તમે આ ગાંડાની વણઝાર

સુદામા ના ગાંડપણે તો
વેઠયા ભૂખ અંગાર.. જી
પાંચ પાંડવ એવા ગાંડા,
જેણે છોડ્યા નહિ કિરતાર
જો જો તમે આ ગાંડાની વણઝાર

વિદુર પત્ની ગાંડી થઈને,
રટે નંદ કુમાર.. જી
છબિલાને એ છોતરા આપ્યા,
ગર્ભ ફેંક્યા બહાર
જો જો તમે આ ગાંડાની વણઝાર

બોડાણા નાં ગાંડપણે તો
કામ કર્યું હદપાર..જી
દ્વારિકા નો ઠાકોર આવ્યા,
ડાકોર ગામ મોજાર
જો જો તમે આ ગાંડાની વણઝાર

કબીર, તુલસી, સુર ગાંડો
અને રોહિદાસ ચમાર..જી
મોરાંદે તો ગાંડા થઈ ને,
ગાંડો કીધો સંસાર
જો જો તમે આ ગાંડાની વણઝાર

ધનો ગાંડો, આ ધીરો ગાંડો અને
ગાંડો પ્રીતમ પ્યાર..જી
સખુ મીરાં કર મા ગાંડી,
જેણે છોડ્યા જગ થી તાર
જો જો તમે આ ગાંડાની વણઝાર

દાદુ ગાંડો, પીપો ગાંડો અને
અખૈ યો એ સોનાર..જી
પંઢર પૂર માં, ગોરો ગાંડો,
ઈતો ઘડા નો ઘડનાર
જો જો તમે આ ગાંડાની વણઝાર

નામો , ગામો, સૂકો, ગાંડો અને
મૂળદાસ લોહાર ..જી
જલારામ ની વાત શું કરવી,
જેણે વળાવી ઘરની નાર
જો જો તમે આ ગાંડાની વણઝાર

જુનાગઢ નો નાગર ગાંડો,
ઈ તો નાચ્યો થૈ થૈ કાર..જી
બાવન કામ, કર્યા પ્રભુ એ,
એના છતાં આવ્યો નહિ અંહકાર
જો જો તમે આ ગાંડાની વણઝાર

થયા ઘણા અને હાલમાં પણ છે,
અને ભવિષ્યે પણ થનાર ..જી
ભક્ત કુળનો નાશ નથી,
એ બોલ્યા જગત આધાર
જો જો તમે આ ગાંડાની વણઝાર

દુનિયા એ જેને ગાંડા ગણ્યા પણ
હરિ ને મન હોંશિયાર..જી
ગોવિંદ ગાંડો, એનું ગીત ગાંડુ,
ને ગાંડા સાંભળ નાર
જો જો તમે આ ગાંડાની વણઝાર